Viral Video: భూగర్భంలోని అత్యంత లోతైన బావిలో నుంచి ఒక భారీ రైలు వేగంగా వెళ్తే ఎలా ఉంటుంది? వినడానికి ఎంతో ఆశ్చర్యంగా అనిపించే ఈ అద్భుతమైన దృశ్యానికి సంబంధించిన ఒక వీడియో తాజాగా సోషల్ మీడియాలో విపరీతంగా వైరల్ అవుతోంది. పైనుంచి చూస్తే అచ్చం ఒక పెద్ద నీటి బావిలాగా కనిపించే ఆ అగాధంలో నుంచి ట్రైన్ దూసుకుపోతున్న అరుదైన విజువల్స్ నెటిజన్లను కట్టిపడేస్తున్నాయి. నిజానికి వీడియోలో కనిపిస్తున్నది నీళ్ల బావి కాదు. పశ్చిమ కనుమల గుండా సాగే కొంకణ్ రైల్వే లైన్లోని ఒక సొరంగంలో ఏర్పాటు చేసిన ప్రత్యేకమైన వెంటిలేషన్ షాఫ్ట్ అని రైల్వే అధికారులు స్పష్టం చేశారు. మహారాష్ట్రలోని రత్నగిరి సమీపంలో ఉక్షి, భోకే రైల్వే స్టేషన్ల మధ్య ఈ అద్భుతమైన కర్బుడే టన్నెల్ (సొరంగం) ఉంది. సుమారు 6.5 కిలోమీటర్ల పొడవుండే ఈ సొరంగం భారతీయ రైల్వే చరిత్రలో ఒక ఇంజనీరింగ్ అద్భుతంగా పేరుగాంచింది. దట్టమైన పశ్చిమ కనుమల గుండా అత్యంత కష్టసాధ్యమైన భౌగోళిక పరిస్థితుల్లో ఈ కొంకణ్ రైల్వే ప్రాజెక్టును అత్యంత ప్రతిష్టాత్మకంగా నిర్మించారు. ఈ భారీ ప్రాజెక్టు నిర్మాణానికి అప్పట్లో సుమారు రూ. 3500 కోట్లు వరకు నిధులు ఖర్చయ్యాయి. ఇంత పొడవైన సొరంగంలో రైళ్లు ప్రయాణించేటప్పుడు లోపల ప్రయాణికులకు గాలి ఆడేందుకు, డీజిల్ ఇంజన్ల నుంచి వచ్చే పొగ సులభంగా బయటకు పోవడానికి ఇంజనీర్లు పైన ఎత్తైన కొండల నుంచి కింద సొరంగం వరకు ఇలాంటి భారీ వెంటిలేషన్ షాఫ్ట్లను డిజైన్ చేశారు. పచ్చటి అడవిలో నుంచి లోపలికి ఇలా రంధ్రాలు చేయడం వెనుక అపారమైన కష్టం దాగి ఉంది. ఈ షాఫ్ట్లు పైనుంచి చూసేందుకు అచ్చం ఒక లోతైన పాడుబడిన బావి ఆకారంలో కనిపిస్తాయి. దట్టమైన అడవి మధ్యలో ఉన్న ఈ షాఫ్ట్ పైభాగం నుంచి ఒక పర్యాటకుడు తన కెమెరాతో లోపలికి వీడియో తీశాడు. సరిగ్గా అదే సమయానికి సొరంగం లోపల ట్రాక్ మీద ఒక రైలు వేగంగా దూసుకుపోయింది. చీకటిగా ఉన్న ఆ సొరంగంలో రైలు లైట్ల వెలుతురు, ఇంజన్ శబ్దం పైనుంచి చూసేందుకు భయంతో పాటు ఎంతో అద్భుతంగా అనిపించింది. ప్రకృతి అందాల మధ్య దాగిన ఈ ఇంజనీరింగ్ మార్వెల్ను చూసి ప్రతి ఒక్కరూ ఆశ్చర్యపోతున్నారు. భూమి అడుగున ఇంత అద్భుతమైన రైల్వే వ్యవస్థ ఉందా అని పలువురు ముక్కున వేలేసుకుంటున్నారు. సాంకేతిక పరిజ్ఞానం పెద్దగా లేని రోజుల్లోనే కొండలను తొలిచి ఇంతటి భారీ సొరంగాలు, షాఫ్ట్లు నిర్మించిన భారతీయ రైల్వే ఇంజనీర్ల ప్రతిభను నెటిజన్లు ఆకాశానికెత్తుతున్నారు. ప్రకృతి సిద్ధంగా ఏర్పడిన పశ్చిమ కనుమల అందాలను ఏమాత్రం పాడుచేయకుండా ఇలాంటి నిర్మాణాలను చేపట్టడం నిజంగా గర్వకారణమని ప్రశంసిస్తున్నారు. అడ్వెంచర్ ఇష్టపడే పర్యాటకులకు, రైల్వే అభిమానులకు ఈ వీడియో ఒక కనువిందులా మారింది. లక్షలాది మంది వీక్షించిన ఈ వీడియో ప్రస్తుతం సోషల్ మీడియా ప్లాట్ఫామ్లలో ట్రెండింగ్లో నిలిచింది. పశ్చిమ కనుమల్లో ప్రయాణం ఎప్పుడూ ఒక మధురానుభూతిని ఇస్తుందని, ఈ దృశ్యాలు దానిని మరింతగా రుజువు చేస్తున్నాయని పలువురు కామెంట్లు పెడుతున్నారు. వర్షాకాలంలో పచ్చదనం నిండిన ఈ ప్రదేశం మరింత అందంగా తయారవుతుంది. 2017లో వెబ్ జర్నలిస్ట్గా నా కెరీర్ ప్రారంభించాను. పలు వెబ్సైట్స్లో కంటెంట్ రైటర్గా పని చేశాను.
