Ind-Pak: మరోసారి సముద్ర వివాదం.. నౌక ఢీకొనడంపై పాక్ వాదనను ఖండించిన భారత్ భారత్-పాక్ మధ్య మరోసారి సముద్ర వివాదం నౌక ఢీకొనడంపై పాక్ వాదనను ఖండించిన భారత్ ఎప్పటిలాగే తప్పించుకునే ప్రయత్నం చేస్తోందని వ్యాఖ్య Follow Us : --> Add as a preferred source on google భారత్-పాకిస్థాన్ మధ్య మరోసారి సముద్ర వివాదం రాజుకుంది. అరేబియా సముద్రంలో భారత నౌకాదళానికి చెందిన ఐఎన్ఎస్ కోల్కతా, పాకిస్థాన్ నేవీకి చెందిన పీఎన్ఎస్ హునైన్ (PNS Hunain) ఢీకొన్న ఘటనపై ఇరుదేశాలు పరస్పరం ఆరోపణలు చేసుకుంటున్నాయి. ఈ ఘటనపై పాకిస్థాన్ ఇచ్చిన వివరణను భారత్ శుక్రవారం తీవ్రంగా ఖండించింది. పాక్ వాదనను ‘ఎప్పటిలాగే తప్పించుకునే ప్రయత్నం’గా అభివర్ణించిన విదేశాంగ శాఖ అధికార ప్రతినిధి రణధీర్ జైస్వాల్.. ఇస్లామాబాద్ చేసిన ఆరోపణలను, సూచనలను తిరస్కరిస్తున్నట్లు తెలిపారు. భారత వాదన ప్రకారం.. ఐఎన్ఎస్ కోల్కతా పశ్చిమ అరేబియా సముద్రంలో సాధారణ విధుల్లో భాగంగా ప్రయాణిస్తుండగా, పీఎన్ఎస్ హునైన్ ప్రమాదకరంగా ఓవర్టేక్ చేసే ప్రయత్నం చేసింది. ఈ క్రమంలోనే రెండు నౌకలు ఢీకొన్నాయని రణధీర్ జైస్వాల్ తెలిపారు. పీఎన్ఎస్ హునైన్ చేపట్టిన ‘డేంజరస్ ఓవర్టేకింగ్ మానీవర్’ 1991లో భారత్-పాకిస్థాన్ మధ్య కుదిరిన సైనిక విన్యాసాలు, కదలికలకు సంబంధించిన ముందస్తు నోటీసు ఒప్పందంలోని ఆర్టికల్ 10ను తీవ్రంగా ఉల్లంఘించిందని భారత్ పేర్కొంది. సముద్రంలో కార్యకలాపాలు నిర్వహించే ఇరుదేశాల నౌకాదళ యూనిట్లు కనీసం మూడు నాటికల్ మైళ్ల దూరాన్ని పాటించాల్సి ఉంటుందని భారత్ తెలిపింది. అంతేకాకుండా సముద్రంలో ఢీకొనకుండా నిరోధించేందుకు ఉద్దేశించిన అంతర్జాతీయ నిబంధనలను కూడా పాకిస్థాన్ నౌక ఉల్లంఘించిందని జైస్వాల్ ఆరోపించారు. ఇరుదేశాల మధ్య ఉన్న సంబంధిత ఒప్పందాల్లోని నిబంధనలను గౌరవిస్తూ.. తమ సైనిక విభాగాలు తగిన జాగ్రత్తలు పాటించాలని పాకిస్థాన్కు మరోసారి సూచించినట్లు జైస్వాల్ తెలిపారు. భవిష్యత్తులో ఇలాంటి ఘటనలు పునరావృతం కాకుండా జాగ్రత్త వహించాలని భారత్ స్పష్టం చేసింది. ఈ ఢీకొన్న ఘటనలో INS Kolkataకు పెద్దగా నష్టం జరగలేదని, అది సముద్రంలో తన కార్యకలాపాలను కొనసాగిస్తోందని భారత విదేశాంగ శాఖ తెలిపింది. అయితే ఈ ఘటనపై పాకిస్థాన్ పూర్తిగా భిన్నమైన వాదనను వినిపించింది. INS Kolkata తమ నౌకకు సమీపంలో దూకుడైన, ప్రమాదకరమైన మానీవర్లు చేపట్టిందని ఆరోపించింది. పాకిస్థాన్ నేవీ SEASPARK-26 విన్యాసాలు నిర్వహిస్తున్న సమయంలో తమ ప్రత్యేక ఆర్థిక మండలి (EEZ) పరిధిలోనే ఈ ఘటన జరిగిందని ఇస్లామాబాద్ పేర్కొంది. భారత్ మాత్రం ఈ ఘటన అంతర్జాతీయ జలాల్లో జరిగిందని చెబుతోంది. ఘటనపై ఇరుదేశాలు పరస్పరం దౌత్యపరమైన నిరసనలు కూడా వ్యక్తం చేశాయి. ఘటన తర్వాత PNS Hunain దెబ్బతిన్నట్లు, అనంతరం మరమ్మతుల కోసం పోర్టుకు తిరిగి వెళ్లినట్లు పలు నివేదికలు పేర్కొన్నాయి. మరోవైపు INS Kolkataకు పెద్దగా నష్టం జరగలేదని, అది సముద్రంలోనే తన విధులను కొనసాగిస్తోందని భారత్ వెల్లడించింది. ప్రస్తుతం ఈ ఘటనపై ఇరుదేశాల మధ్య భిన్న వాదనలు కొనసాగుతున్న నేపథ్యంలో.. అసలు ఢీకొన్న ఘటనకు దారితీసిన పరిస్థితులపై మరింత స్పష్టత రావాల్సి ఉంది
