డయానా పెళ్లి నాటి చేదు నిజాలు..Andhra Prabha Top Story బ్రిటన్ రాజకుటుంబాన్ని మరోసారి పాత గాయాలు వెంటాడుతున్నాయి. దివంగత యువరాణి డయానా సోదరుడు, ఎర్ల్ చార్లెస్ స్పెన్సర్ రాసిన ‘స్వాన్ సాంగ్’ పుస్తకంలోని కొన్ని అంశాలు తాజాగా వెలుగులోకి రావడంతో రాజకుటుంబంలో కలకలం రేగింది. డయానా-ప్రస్తుత రాజు చార్లెస్-III వైవాహిక జీవితంలోని చేదు అనుభవాలు, ఆమె మరణానంతరం చార్లెస్ స్పందనకు సంబంధించిన సంచలన విషయాలను స్పెన్సర్ తన పుస్తకంలో ప్రస్తావించినట్లు కథనాలు వెలువడ్డాయి. పుస్తకం ఇంకా పూర్తిగా ప్రచురణకు రాకముందే.. అందులోని కొన్ని భాగాలు బ్రిటన్ రాజకుటుంబాన్ని ఇరకాటంలోకి నెట్టాయి. సాధారణంగా పుస్తకాలపై స్పందించని బకింగ్హామ్ ప్యాలెస్ సైతం ఈసారి అరుదైన రీతిలో ఘాటుగా స్పందించింది. కుటుంబ సభ్యుడిని కోల్పోయిన బాధ.. వ్యక్తి ఆలోచనలను, నిర్ణయాలను, జ్ఞాపకాలను ప్రభావితం చేయవచ్చని రాజు చార్లెస్ భావిస్తున్నట్లు ప్యాలెస్ ప్రతినిధి వ్యాఖ్యానించారు. 1997 ఆగస్టు 31.. పారిస్లో జరిగిన ఘోర కారు ప్రమాదంలో డయానా ప్రాణాలు కోల్పోయిన రాత్రి తనకు ఇప్పటికీ గుర్తుందని స్పెన్సర్ పుస్తకంలో వివరించినట్లు కథనాలు పేర్కొంటున్నాయి. ప్రమాదవార్త తెలిసినప్పటి నుంచి సోదరి జేన్తో తరచూ ఫోన్లో మాట్లాడిన విషయాన్ని ఆయన గుర్తు చేసుకున్నారు. డయానా మరణించినట్లు తెలిసిన తర్వాత.. అప్పటి ప్రిన్స్ ఆఫ్ వేల్స్ చార్లెస్కు ఫోన్ చేసినట్లు తెలిపారు.. ఆ సమయంలో చార్లెస్ గొంతులో ఉత్సాహం ఉట్టిపడిందని, లాటరీ గెలిచిన వ్యక్తిలా మాట్లాడినట్లు తనకు అనిపించిందని స్పెన్సర్ ఆరోపించారు. డయానాను కోల్పోయిన విషాదం కంటే.. తాను ప్రేమించిన మహిళను వివాహం చేసుకునేందుకు ఈ పరిణామం మార్గం సుగమం చేస్తుందన్న ఆలోచనే చార్లెస్ మనసులో ముందుగా మెదిలి ఉండవచ్చని తాను ఇప్పుడు భావిస్తున్నట్లు పుస్తకంలో రాసినట్లు సమాచారం. ఇవి స్పెన్సర్ వ్యక్తిగత జ్ఞాపకాల ఆధారంగా చేసిన వ్యాఖ్యలు మాత్రమే. చార్లెస్ స్పందనకు సంబంధించిన ఈ వాదనలను స్వతంత్రంగా నిర్ధారించినట్లు కథనంలో ఆధారాలు లేవు. డయానా అంత్యక్రియల సమయంలో ఆమె కుమారులు ప్రిన్స్ విలియం, ప్రిన్స్ హ్యారీ శవపేటిక వెనుక నడవాలా? వద్దా? అన్న అంశంపై తనకు, చార్లెస్కు మధ్య తీవ్ర వాగ్వాదం జరిగినట్లు స్పెన్సర్ పేర్కొన్నారు. ఆ సంభాషణలో చార్లెస్ కోపంతో మాట్లాడారని, కాసేపు ఆగిన తర్వాత డయానాపై తనలో దాగి ఉన్న అసహనాన్ని వెళ్లగక్కినట్లు తనకు అనిపించిందని రాశారు. ప్రపంచమంతా డయానా మరణంతో కదిలిపోవడంపై చార్లెస్ అసహనం వ్యక్తం చేసినట్లు స్పెన్సర్ ఆరోపించారు. ఆ సందర్భంలో.. “ఆమెను మనం త్వరలోనే మర్చిపోతాం.. ఆ విషయం నమ్మండి” అని చార్లెస్ అన్నట్లు తన పుస్తకంలో పేర్కొన్నారు. ఆ మాటలు విని తాను నిర్ఘాంతపోయానని, వెంటనే ఫోన్ పెట్టేశానని స్పెన్సర్ వివరించినట్లు డైలీ మెయిల్ కథనం తెలిపింది. డయానా శవపేటిక వెనుక నడవడాన్ని తన జీవితంలో అత్యంత హృదయవిదారక అనుభవాల్లో ఒకటిగా స్పెన్సర్ అభివర్ణించారు. ఆ విషాద సమయంలో హ్యారీ పట్ల తగిన శ్రద్ధ, ఆదరణ కనిపించలేదని ఆందోళన వ్యక్తం చేశారు. తల్లిని కోల్పోయిన హ్యారీకి ఆమె కౌగిలింతలు, ఓదార్పు
