ENG vs PAK : లార్డ్స్ టెస్టులోనూ ఇంగ్లండ్ జయభేరి మోగించింది. పేసర్లు ఓలీ రాబిన్సన్(4-24), జోఫ్రా ఆర్చర్(2-73)లు విజృంభించగా 194 రన్స్ తేడాతో పాకిస్థాన్ను చిత్తు చేసింది ఆతిథ్య జట్టు. 389 పరుగుల భారీ ఛేదనలో షాద్ షకీల్(97) పోరాడినా.. మిడిలార్డర్ వైఫల్యం పాక్ను ముంచింది. టీ బ్రేక్ తర్వాత జోష్ టంగ్(3-46) ధాటికి ప్రత్యర్థి బ్యాటర్లు తోకముడిచారు. దాంతో, సిరీస్ సమం చేయాలనుకున్న పాక్ ఆశలు అడియాశలయ్యాయి. బెన్ స్టోక్స్ వీడ్కోలు తర్వాత తిరిగి పగ్గాలు చేపట్టిన జో రూట్ సారథిగా స్వదేశంలో తొలి టెస్టు సిరీస్ విజయం సాధించాడు. స్వదేశంలో పాకిస్థాన్తో జరుగుతున్న మూడు టెస్టుల సిరీస్లో ఇంగ్లండ్ పంజా విసిరింది. లార్డ్స్లో పేస్ త్రయం ఓలీ రాబిన్సన్(4-24), జోఫ్రా ఆర్చర్(2-73)లు వికెట్ల వేటతో పాక్ నడ్డివిరవగా నాలుగో రోజే మ్యాచ్ను ముగించింది. ఇంగ్లండ్ను 208కే ఆలౌట్ చేసిన పాక్.. 389 పరుగుల ఛేదనలో చతికిలపడింది. రెండో ఇన్నింగ్స్ ఆరంభంలోనే రాబిన్సన్ ధాటికి ఓపెనర్ అజాన్ అవైస్(6), అబ్దుల్లా షఫిక్(0)లు ఔటయ్యారు. కాసేపటికే బాబర్ ఆజాం(6)ను ఆర్చర్ బౌన్సర్తో బోల్తా కొట్టించాడు.14కే మూడు వికెట్లు పడిన వేళ.. మాజీ సారథి షాన్ మసూద్(26), సాద్ షకీల్(97) నిలబడ్డారు. ఇంగ్లండ్ పేసర్లను ఇద్దరు కాచుకోవడంతో 55/3తో లంచ్కు వెళ్లిన పాక్.. ఆ తర్వాత మళ్లీ వికెట్లు కోల్పోయింది. నాలుగో వికెట్కు 97 రన్స్ జోడించిన ఈ ద్వయాన్ని విడదీసిన రాబిన్సన్ పాక్ను ఓటమి అంచున నెట్టాడు. టీ బ్రేక్ తర్వాత టంగ్ విజృంభణతో.. 194కే పర్యాటక జట్టు కుప్పకూలింది. రెండు టెస్టుల్లోనూ గెలుపొందిన ఇంగ్లండ్ సిరీస్ కైవసం చేసుకుంది. నామమాత్రమైన మూడో టెస్టు సెప్టెంబర్ 9న బర్మింగ్హమ్లో జరుగనుంది. నాలుగో రోజు జహీర్ అబ్బాస్(5-57) విజృంభణతో లోయర్ ఆర్డర్ తోకముడవగా ఆతిథ్య జట్టు 208 పరుగులకే ఆలౌటైంది. ఓలీ రాబిన్సన్(8)ను పెవిలియన్ పంపిన అబ్బాస్ లార్డ్స్లో ఐదువికెట్ల ప్రదర్శన చేశాడు. తొలి ఇన్నింగ్స్లో 180 పరుగుల ఆధిక్యంతో ఆట కొనసాగించిన ఇంగ్లండ్ను పాక్ పేసర్లు అద్భుతంగా కట్టడి చేశారు. అబ్బాస్, ఖుర్రం, మొహమ్మద్ అలీలు వరసగా వికెట్లు తీసి పాక్ను పోటీలోకి తెచ్చారు. అయితే.. హ్యారీ బ్రూక్(34), డాన్ లారెన్స్(54)లు పట్టుదలగా ఆడారు. పునరాగమనం సిరీస్లో ఆకట్టుకున్న లారెన్స్ అర్ధ శతకంతో ఇంగ్లండ్ ఆధిక్యాన్ని పెంచుతూ పోయాడు. క్రీజులో పాతుకుపోయిన అతడిని బౌల్డ్ చేసిన అబ్బాస్ ఇంగ్లండ్ పతనాన్ని శాసించాడు. చివరి బ్యాటరైన ఓలీ రాబిన్సన్(8) వికెట్టూ తీసి.. లార్డ్స్తో చిరస్మరణీయ ప్రదర్శనతో రికార్డు సాధించాడీ పాక్ పేసర్
