జైపూర్, జోధ్పూర్, కోటా ఫలితాల విశ్లేషణలో ఆసక్తికర అంశాలు కాంగ్రెస్ అభ్యర్థులకు ఎక్కువ ఓట్లు వచ్చినా.. బీజేపీకి ఎక్కువ వార్డులు ఆంధ్రప్రభ, వెబ్ డెస్క్: జైపూర్, జోధ్పూర్, కోటా మున్సిపల్ కార్పొరేషన్ల ఎన్నికల ఫలితాలను పరిశీలిస్తే వార్డుల పునర్విభజన (డీలిమిటేషన్) ఫలితాలపై ప్రభావం చూపిందన్న చర్చ మొదలైంది. ఈ మూడు కార్పొరేషన్లలో కాంగ్రెస్కు బీజేపీ కంటే స్వల్పంగా ఎక్కువ ఓట్లు వచ్చినప్పటికీ.. బీజేపీ ఎక్కువ వార్డులను గెలుచుకుంది. మొత్తం మీద కాంగ్రెస్ అభ్యర్థులకు వచ్చిన ఓట్ల సగటు.. బీజేపీ అభ్యర్థుల కంటే ఎక్కువగా ఉన్నట్లు విశ్లేషణలో తేలింది. కాంగ్రెస్ ఓట్లు కొన్ని ప్రాంతాల్లో ఎక్కువగా కేంద్రీకృతం కావడం, బీజేపీ ఓట్లు ఎక్కువ వార్డుల్లో విస్తరించి ఉండటం ఈ వ్యత్యాసానికి ఒక కారణంగా కనిపిస్తోంది. జైపూర్, జోధ్పూర్, కోటాలో కాంగ్రెస్ గెలిచిన వార్డుల్లో జనాభా సగటు కూడా బీజేపీ గెలిచిన వార్డులతో పోలిస్తే కొంత ఎక్కువగా ఉంది. ముఖ్యంగా కోటాలో ఈ వ్యత్యాసం మరింత స్పష్టంగా కనిపించింది. అత్యధిక వ్యక్తిగత ఓట్లు సాధించిన అభ్యర్థుల్లోనూ కాంగ్రెస్ అభ్యర్థుల ఆధిపత్యం కనిపించగా, గెలుపు మార్జిన్లలోనూ ఆ పార్టీ అభ్యర్థులు పలుచోట్ల ముందున్నారు. ఇదే అంశాన్ని ప్రస్తావిస్తూ కాంగ్రెస్ నేతలు డీలిమిటేషన్పై అభ్యంతరాలు వ్యక్తం చేస్తున్నారు. వార్డుల జనాభా, ఓటర్ల సంఖ్యలో భారీ తేడాలు ఉండటంతో ఫలితాల్లో అసమానత ఏర్పడిందని కాంగ్రెస్ రాష్ట్ర అధ్యక్షుడు గోవింద్ సింగ్ దోతస్రా ఆరోపించారు. మాజీ సీఎం అశోక్ గెహ్లాట్ కూడా జోధ్పూర్లో కొన్ని కాంగ్రెస్ అనుకూల ప్రాంతాలను ఒకే వార్డుగా కలిపి, బీజేపీకి అనుకూల ప్రాంతాలను విడగొట్టారని ఆరోపించారు. అయితే ఇదే డీలిమిటేషన్పై గతంలో బీజేపీ కూడా కాంగ్రెస్ ప్రభుత్వాన్ని విమర్శించింది. 2020 ఎన్నికలకు ముందు జైపూర్, జోధ్పూర్, కోటా కార్పొరేషన్లను విభజించిన కాంగ్రెస్ ప్రభుత్వం రాజకీయ ప్రయోజనాల కోసం వార్డుల పునర్విభజన చేసిందని అప్పట్లో బీజేపీ నేతలు ఆరోపించారు. ప్రస్తుతం అధికారంలో ఉన్న బీజేపీ ప్రభుత్వం తిరిగి ఆ కార్పొరేషన్లను ఏకీకృతం చేసి కొత్తగా డీలిమిటేషన్ చేపట్టింది. గతంలో రాజకీయ ప్రయోజనాలను దృష్టిలో పెట్టుకుని జరిగిన విభజనను సరిచేశామని బీజేపీ నాయకులు వాదిస్తున్నారు. తాజా ఫలితాలు మాత్రం డీలిమిటేషన్ కేవలం పరిపాలనా ప్రక్రియ మాత్రమేనా, లేక ఎన్నికల ఫలితాలపై కూడా ప్రభావం చూపే అంశమా అనే చర్చకు దారితీశాయి
