పాకిస్థాన్ స్టార్ పేసర్ మహ్మద్ అమీర్ తన అంతర్జాతీయ క్రికెట్ భవిష్యత్తుపై కీలక ప్రకటన చేశాడు. పాకిస్థాన్ జట్టులోకి తిరిగి వచ్చే అవకాశాలకు పూర్తిగా తెరపడిందని స్పష్టం చేశాడు. బ్రిటిష్ పౌరసత్వం పొందిన తర్వాత ఇంగ్లండ్లో స్థానిక ఆటగాడిగా కొనసాగుతున్నందున.. తన పాకిస్థాన్ క్రికెట్ అధ్యాయం ముగిసిపోయిందని తెలిపాడు. క్రికెట్ యూట్యూబర్ ఫుర్కాన్ భట్టి నిర్వహించిన ఇంటర్వ్యూలో మహ్మద్ అమీర్ తన భవిష్యత్తుపై మాట్లాడాడు. బ్రిటిష్ పౌరసత్వం పొందిన తర్వాత ప్రస్తుతం తాను ‘బ్రిటిష్ లోకల్’గా ఉన్నానని చెప్పాడు. ఇంగ్లండ్లో కౌంటీ ఛాంపియన్షిప్, ది హండ్రెడ్ వంటి టోర్నీల్లో స్థానిక ఆటగాడిగా ఆడాలంటే.. మరో దేశానికి స్థానిక ఆటగాడిగా ప్రాతినిధ్యం వహించబోనని ఒక పత్రంపై సంతకం చేయాల్సి ఉంటుందని అమీర్ వివరించాడు. అందుకే పాకిస్థాన్ క్రికెట్తో తనకు ఉన్న పాత అధ్యాయం ముగిసిపోయిందని స్పష్టం చేశాడు. మహ్మద్ అమీర్ ఈ ఏడాది బ్రిటిష్ పౌరసత్వం, పాస్పోర్ట్ పొందాడు. అతని భార్య నార్జిస్ ఖాన్ ద్వారా ఈ పౌరసత్వం లభించింది. దీంతో ఇంగ్లండ్ దేశవాళీ క్రికెట్లో అతడు ‘లోకల్ ప్లేయర్’గా ఆడే అవకాశం దక్కింది. 2026 ది హండ్రెడ్ సీజన్లో ట్రెంట్ రాకెట్స్ తరపున కూడా స్థానిక ఆటగాడిగానే బరిలోకి దిగాడు. ఏడు మ్యాచ్ల్లో తొమ్మిది వికెట్లు పడగొట్టాడు. మహ్మద్ అమీర్ 2009లో 17 ఏళ్ల వయసులో పాకిస్థాన్ అంతర్జాతీయ జట్టులోకి అడుగుపెట్టాడు. తన కెరీర్లో ఎన్నో అద్భుత ప్రదర్శనలు చేశాడు. 2017 ఛాంపియన్స్ ట్రోఫీ ఫైనల్లో భారత్పై అమీర్ చెలరేగిన తీరు పాకిస్థాన్ అభిమానులు ఎప్పటికీ మర్చిపోలేరు. అంతకుముందు 2009 టీ20 ప్రపంచకప్ విజేత పాకిస్థాన్ జట్టులోనూ అతడు కీలక సభ్యుడిగా ఉన్నాడు. పాకిస్థాన్ తరపున అమీర్ మూడు ఫార్మాట్లలో కలిపి 159 అంతర్జాతీయ మ్యాచ్లు ఆడాడు. ఇందులో 36 టెస్టులు, 61 వన్డేలు, 62 టీ20లు ఉన్నాయి. మొత్తంగా 271 వికెట్లు తన ఖాతాలో వేసుకున్నాడు. టెస్టుల్లో 119, వన్డేల్లో 81 వికెట్లు సాధించాడు. అమీర్ అంతర్జాతీయ క్రికెట్ ప్రయాణం ఎన్నో మలుపులు తిరిగింది. 2020లో రిటైర్మెంట్ ప్రకటించిన అతడు.. 2024 టీ20 ప్రపంచకప్ కోసం పాకిస్థాన్ జట్టులోకి తిరిగి వచ్చాడు. అయితే అదే ఏడాది డిసెంబరులో మరోసారి అంతర్జాతీయ క్రికెట్కు వీడ్కోలు పలికాడు. పాకిస్థాన్ క్రికెట్ బోర్డు కూడా అమీర్ రిటైర్మెంట్ను అధికారికంగా ధ్రువీకరించింది. బ్రిటిష్ పౌరసత్వం పొందిన నేపథ్యంలో అమీర్ భవిష్యత్తులో ఇంగ్లండ్ తరపున అంతర్జాతీయ క్రికెట్ ఆడే అవకాశం ఉందా అనే చర్చ మొదలైంది. సాంకేతికంగా అతడికి అర్హత ఉండొచ్చని సమాచారం. అయితే ఇంగ్లండ్ పేస్ బౌలింగ్ విభాగంలో ఇప్పటికే పలువురు యువ, అనుభవజ్ఞులైన బౌలర్లు ఉండటంతో జాతీయ జట్టులో చోటు దక్కడం అంత సులభం కాదనే అభిప్రాయాలు ఉన్నాయి. బ్రిటిష్ లోకల్ ప్లేయర్గా తన కొత్త కెరీర్ను కొనసాగిస్తున్న మహ్మద్ అమీర్.. పాకిస్థాన్ తరపున మళ్లీ ఆడే అవకాశాలకు తానే స్వయంగా తెరదించాడు. దీంతో 15 ఏళ్లకు పైగా సాగిన అతడి పాకిస్థాన్ అంతర్జాతీయ క్రికెట్ ప్రయాణానికి అధికారికంగా ముగింపు పలికినట్లైంది. 2013లో జర్నలిస్ట్గా నా కెరీర్ ప్రారంభించాను. పలు వెబ్సైట్లలో కంటెంట్ రైటర్
