రైతుల్లో ఆనందం.. ప్రజల్లో ఉత్సాహం వికారాబాద్, ఆంధ్రప్రభ : వికారాబాద్ జిల్లా కేంద్రంతో పాటు పరిసర మండలాల్లో ఆదివారం మధ్యాహ్నం భారీ వర్షం కురిసింది. గత కొంతకాలంగా వర్షాలు లేక కరువు పరిస్థితులు నెలకొంటున్న నేపథ్యంలో వర్షం కోసం ఎదురుచూస్తున్న ప్రజలకు ఈ వర్షం ఊరటనిచ్చింది. ముఖ్యంగా పంటలు ఎండిపోతాయంటూ ఆందోళన చెందుతున్న రైతుల్లో ఆనందం నెలకొంది. మరోవైపు విద్యుత్ కోతలతో సతమతమవుతున్న ప్రజలకు కూడా వర్షం కొంత ఉపశమనం కలిగించింది. గత వారం రోజులుగా వర్షాలు లేకపోవడంతో నీటి ఎద్దడి ఏర్పడుతుందేమోనన్న ఆందోళన వ్యక్తమవుతోంది. ఈ నేపథ్యంలో ఆదివారం కురిసిన వర్షం రైతుల్లో నూతన ఉత్సాహాన్ని నింపింది. వర్షం కారణంగా భూగర్భ జలాలు పెరిగే అవకాశం ఉండటంతో పాటు పంటలకు కూడా మేలు జరుగుతుందని రైతులు ఆశాభావం వ్యక్తం చేస్తున్నారు. జిల్లా వ్యాప్తంగా ఆదివారం వర్షం కురిసినట్లు సమాచారం
