Amaravati: ఆంధ్రప్రదేశ్ రాజధాని అమరావతి అభివృద్ధిలో భాగంగా ఆధునిక సాంకేతికతను అందుబాటులోకి తీసుకురావడంపై ప్రభుత్వం దృష్టి సారించింది. ఇందులో భాగంగా రాజధాని ప్రాంతంలో డిస్ట్రిక్ట్ కూలింగ్ సిస్టమ్ (District Cooling System–DCS) ఏర్పాటు చేయాలని నిర్ణయించింది. ఒకే కేంద్ర ప్లాంట్ నుంచి చల్లని నీటిని సరఫరా చేసి.. దాని ద్వారా అనేక ప్రభుత్వ, వాణిజ్య, ఇతర భవనాలను శీతలీకరించే విధంగా వ్యవస్థను రూపొందించనున్నారు. ఇందుకు సంబంధించి రాజధాని ప్రాంత అభివృద్ధి సంస్థ CRDA టెండర్లను ఆహ్వానించింది. సాధారణంగా ఒక్కో భవనానికి ప్రత్యేకంగా ఏసీ చిల్లర్లు, కూలింగ్ టవర్లు, ఇతర శీతలీకరణ పరికరాలను ఏర్పాటు చేస్తుంటారు. దీనివల్ల ప్రతి భవనంలోనూ భారీ స్థలాన్ని కూలింగ్ పరికరాల కోసం కేటాయించాల్సి వస్తుంది. అదే సమయంలో విద్యుత్ వినియోగం కూడా అధికంగా ఉంటుంది. ఈ సమస్యలకు పరిష్కారంగా డిస్ట్రిక్ట్ కూలింగ్ సిస్టమ్ను తీసుకురావాలని CRDA భావిస్తోంది. ఈ విధానంలో ఒక కేంద్ర ప్లాంట్లో భారీ స్థాయిలో శీతలీకరణ వ్యవస్థను ఏర్పాటు చేస్తారు. అక్కడ ఉత్పత్తి చేసే చల్లని నీటిని ప్రత్యేక పైప్లైన్ నెట్వర్క్ ద్వారా పరిధిలోని అనేక భవనాలకు తరలిస్తారు. భవనాల్లోని ఎయిర్ కండిషనింగ్ వ్యవస్థలకు ఈ చల్లని నీటిని వినియోగించడం ద్వారా అవసరమైన ఉష్ణోగ్రతను నిర్వహిస్తారు. దీంతో ప్రతి భవనానికి ప్రత్యేకంగా భారీ చిల్లర్ ప్లాంట్లు ఏర్పాటు చేయాల్సిన అవసరం ఉండదు. రాజధానిలో ప్రభుత్వ కార్యాలయాలు, పరిపాలనా భవనాలు, వాణిజ్య సముదాయాలు, సంస్థల కార్యాలయాలు వంటి భారీ నిర్మాణాలు పెద్ద సంఖ్యలో ఏర్పడనున్న నేపథ్యంలో డిస్ట్రిక్ట్ కూలింగ్ సిస్టమ్ కీలకంగా మారనుంది. భవనాల సంఖ్య పెరిగే కొద్దీ ఒక్కో భవనంలో ప్రత్యేక కూలింగ్ ప్లాంట్లను ఏర్పాటు చేయడం కంటే.. కేంద్రీకృత వ్యవస్థ ద్వారా శీతలీకరణ అందించడం మరింత సమర్థవంతంగా ఉంటుందని అధికారులు భావిస్తున్నారు. ముఖ్యంగా స్థల వినియోగాన్ని గణనీయంగా తగ్గించడంతో పాటు విద్యుత్ వినియోగాన్ని కూడా తగ్గించే అవకాశం ఉందని చెబుతున్నారు. కేంద్రీకృత ప్లాంట్లో శీతలీకరణ ప్రక్రియను సమర్థవంతంగా నిర్వహించవచ్చు. ఒక్కో భవనంలోని చిన్న చిన్న కూలింగ్ వ్యవస్థల కంటే పెద్ద స్థాయి కేంద్ర వ్యవస్థ ద్వారా మెరుగైన సామర్థ్యాన్ని సాధించవచ్చని అంచనా. అదే సమయంలో నిర్వహణ కూడా కేంద్రీకృతంగా ఉండటంతో భవనాల యజమానులు, నిర్వహణ సంస్థలకు ప్రత్యేక కూలింగ్ పరికరాల నిర్వహణ భారం తగ్గుతుంది. పాత పరికరాలను మార్చడం, మరమ్మతులు చేయడం వంటి అంశాల్లోనూ ప్రయోజనం కలిగే అవకాశం ఉంది. అమరావతిని ఆధునిక మౌలిక వసతులతో కూడిన ప్రపంచస్థాయి రాజధానిగా తీర్చిదిద్దే క్రమంలో ఇలాంటి పర్యావరణహిత, శక్తి సామర్థ్య సాంకేతికతలకు ప్రాధాన్యత ఇస్తున్నారు. భవిష్యత్తులో రాజధానిలో నిర్మాణాలు భారీగా పెరిగే నేపథ్యంలో ఇప్పటి నుంచే కేంద్రీకృత మౌలిక వసతులను ఏర్పాటు చేయడం ద్వారా దీర్ఘకాలిక ప్రయోజనాలు పొందాలని CRDA లక్ష్యంగా పెట్టుకుంది. ఒకే కేంద్రం నుంచి అనేక భవనాలకు శీతలీకరణ అందించే డిస్ట్రిక్ట్ కూలింగ్ సిస్టమ్ అమరావతి మౌలిక వసతుల్లో మరో కీలక అడుగుగా మారనుంది. స్థల వినియోగం తగ్గడం, విద్యుత్ ఆదా కావడం,
