క్రికెట్లో ఒక్కోసారి ఊహించని ఘటనలు చోటుచేసుకుంటాయి. ఇంగ్లాండ్ కౌంటీ ఛాంపియన్షిప్లో అలాంటి ఆసక్తికర పరిణామమే జరిగింది. గెలుపునకు కేవలం 4 పరుగులు మాత్రమే అవసరమైన సమయంలోనూ డర్హమ్ జట్టు బ్యాటింగ్కు దిగలేకపోయింది. వెలుతురు తగ్గిపోవడంతో అంపైర్లు ఆటను నిలిపివేశారు. దీంతో మూడు రోజుల్లోనే ముగియాల్సిన మ్యాచ్ నాలుగో రోజుకు వెళ్లింది. చెస్టర్-లీ-స్ట్రీట్లో డర్హమ్, గ్లాస్టర్షైర్ మధ్య రోథేసే కౌంటీ ఛాంపియన్షిప్ డివిజన్-2 మ్యాచ్ జరుగుతోంది. తొలుత బ్యాటింగ్ చేసిన గ్లాస్టర్షైర్ తొలి ఇన్నింగ్స్లో కేవలం 137 పరుగులకే ఆలౌటైంది. అనంతరం డర్హమ్ బ్యాటర్లు భారీగా పరుగులు సాధించారు. డేవిడ్ బెడింగ్హామ్ 122 పరుగులు చేయడంతో డర్హమ్ తొలి ఇన్నింగ్స్లో 384 పరుగులు చేసింది. దీంతో ఆ జట్టుకు ఏకంగా 247 పరుగుల ఆధిక్యం లభించింది. 247 పరుగుల లోటుతో రెండో ఇన్నింగ్స్ ప్రారంభించిన గ్లాస్టర్షైర్ను డర్హమ్ బౌలర్లు మరోసారి తీవ్రంగా ఇబ్బంది పెట్టారు. గ్లాస్టర్షైర్ బ్యాటర్లు కొంత ప్రతిఘటన చూపించినప్పటికీ.. చివరికి 250 పరుగులకే ఆలౌటయ్యారు. దీంతో తొలి ఇన్నింగ్స్ ఆధిక్యాన్ని పరిగణనలోకి తీసుకుంటే డర్హమ్ ముందున్న లక్ష్యం కేవలం 4 పరుగులు మాత్రమే. డర్హమ్ విజయం ఖాయం అనిపించింది. 4 పరుగులు చేస్తే మ్యాచ్ ముగిసిపోతుంది. కానీ అప్పటికే వాతావరణ పరిస్థితులు మారిపోయాయి. ఆకాశం మేఘావృతమైంది. వెలుతురు క్రమంగా తగ్గింది. కొద్దిపాటి వర్షం కూడా అంతరాయం కలిగించింది. పరిస్థితులు మెరుగుపడకపోవడంతో అంపైర్లు ఆట కొనసాగించేందుకు అనుమతించలేదు. సాయంత్రం సుమారు 6:20 గంటలకు వెలుతురు సరిపోవడం లేదని అంపైర్లు జేమ్స్ ట్రెడ్వెల్, స్టీవ్ ఓ’షానెస్సీ నిర్ణయించారు. దీంతో ఆటను నిలిపివేశారు. ఇక్కడ మరో ఆసక్తికర అంశం చోటుచేసుకుంది. డర్హమ్ విజయం కోసం కేవలం నాలుగు పరుగులు మాత్రమే చేయాల్సి ఉండటంతో.. ఒక్క బంతి లేదా కొన్ని బంతుల్లోనే మ్యాచ్ ముగిసే అవకాశం ఉంది. అయితే గ్లాస్టర్షైర్ స్పిన్నర్లతో బౌలింగ్ చేయడానికి నిరాకరించడంతో పరిస్థితి మరింత విచిత్రంగా మారింది. వెలుతురు తక్కువగా ఉన్న సమయంలో ఫాస్ట్ బౌలర్లను ఉపయోగించలేని పరిస్థితి ఏర్పడింది. దీంతో ఆట మొదలయ్యే అవకాశాలు మరింత తగ్గిపోయాయి. ఈ మ్యాచ్లో డర్హమ్ విజయం దాదాపు ఖాయం కావడానికి ప్రధాన కారణం కాసే ఆల్డ్రిడ్జ్ అద్భుత బౌలింగ్. తొలి ఇన్నింగ్స్లో 16 పరుగులిచ్చి ఐదు వికెట్లు తీసిన ఆల్డ్రిడ్జ్.. రెండో ఇన్నింగ్స్లోనూ 47 పరుగులకు నాలుగు వికెట్లు పడగొట్టాడు. దీంతో మ్యాచ్లో మొత్తం 9 వికెట్లు తన ఖాతాలో వేసుకున్నాడు. ఇది అతడి ఫస్ట్క్లాస్ కెరీర్లో అత్యుత్తమ మ్యాచ్ బౌలింగ్ ప్రదర్శనగా నిలిచింది. గతంలో అతడి అత్యుత్తమ గణాంకాలు 8/78గా ఉన్నాయి. గ్లాస్టర్షైర్ ఒక దశలో 173/7తో తీవ్ర ఇబ్బందుల్లో ఉంది. అయితే చివరి వికెట్లలో సాయి కిషోర్, జేటీ లాంగ్రిడ్జ్ కలిసి 39 పరుగులు జోడించారు. సాయి కిషోర్ 29 పరుగులు చేయగా.. లాంగ్రిడ్జ్ 36 పరుగులతో పోరాడాడు. ఈ భాగస్వామ్యం కారణంగానే గ్లాస్టర్షైర్ స్వల్ప ఆధిక్యం సాధించింది. చివరికి గ్లాస్టర్షైర్ 250 పరుగులకు ఆలౌటవడంతో డర్హమ్కు న
