Shorts Pamidi: అనంతపురం జిల్లా పామిడి మండలం పాళ్యం తండా గ్రామానికి చెందిన నిరుపేద గిరిజన కుటుంబ యువకుడు రమావత్ ధాకేశ్వర్ నాయక్ అరుదైన విద్యా ఘనత సాధించి మండలానికి గర్వకారణంగా నిలిచాడు. ప్రతిష్టాత్మకమైన ఇండియన్ ఇన్స్టిట్యూట్ ఆఫ్ టెక్నాలజీ (ఐఐటీ) రూర్కీలో పీహెచ్డీ పూర్తి చేసి ఉన్నత విద్యలో మరో మైలురాయిని అధిరోహించాడు. శంకర్ నాయక్ కుటుంబానికి చెందిన ధాకేశ్వర్ నాయక్, ఆధునిక సాంకేతిక రంగమైన ఎలక్ట్రిక్ ఏవియేషన్ (Electric Aviation) అంశంపై పరిశోధనలు నిర్వహించారు. ఈ పరిశోధనల ఫలితంగా ఆయన రచించిన రెండు పరిశోధనా పత్రాలు అంతర్జాతీయ స్థాయి జర్నల్స్లో ప్రచురితమై విశేష గుర్తింపు పొందాయి. ఎలక్ట్రిక్ ఏవియేషన్ రంగంలో ప్రపంచవ్యాప్తంగా గత వందేళ్ల కాలంలో కేవలం 175 పరిశోధనా పత్రాలు మాత్రమే ప్రాముఖ్యత పొందగా, వాటిలో ధాకేశ్వర్ నాయక్ రచించిన రెండు పరిశోధనా పత్రాలు చోటు దక్కించుకోవడం విశేషంగా నిలిచింది. ఈ ఘనత ద్వారా ఆయన తన ప్రతిభను అంతర్జాతీయ స్థాయిలో చాటుకున్నారు. తన విద్యా ప్రస్థానంలో ఎన్నో ఆర్థిక, సామాజిక సవాళ్లను ఎదుర్కొన్నప్పటికీ పట్టుదలతో ముందుకు సాగిన ధాకేశ్వర్ నాయక్, తన విజయానికి అక్క రుక్మిణి మరియు బావ రవి నాయక్ అందించిన ప్రోత్సాహం, సహకారమే ప్రధాన కారణమని పేర్కొన్నారు. గిరిజన తండా నుంచి వచ్చిన ఒక యువకుడు దేశంలోని అత్యున్నత విద్యాసంస్థల్లో ఒకటైన ఐఐటీలో పీహెచ్డీ పూర్తి చేసి అంతర్జాతీయ స్థాయిలో గుర్తింపు పొందడం పామిడి మండలానికే కాకుండా మొత్తం అనంతపురం జిల్లాకు గర్వకారణంగా మారింది. ఆయన సాధించిన విజయం గిరిజన యువతకు, గ్రామీణ ప్రాంత విద్యార్థులకు స్ఫూర్తిదాయకంగా నిలుస్తోందని స్థానికులు అభిప్రాయపడుతున్నారు. ధాకేశ్వర్ నాయక్ సాధించిన ఈ అరుదైన ఘనతపై పాళ్యం తండా గ్రామస్తులు, ప్రజాప్రతినిధులు, విద్యావేత్తలు మరియు పామిడి మండల ప్రజలు హర్షం వ్యక్తం చేస్తూ అభినందనలు తెలియజేస్తున్నారు. ఆయన భవిష్యత్తులో మరిన్ని ఉన్నత శిఖరాలను అధిరోహించాలని ఆకాంక్షిస్తున్నారు
