ఆంధ్రప్రభ : ప్రముఖ స్టాండప్ కమెడియన్ సమయ్ రైనా నిర్వహిస్తున్న రియాలిటీ షో ‘ఇండియాస్ గాట్ లేటెంట్’ రెండో సీజన్ మరోసారి వివాదంలో చిక్కుకుంది. తాజాగా విడుదలైన ఓ ఎపిసోడ్లో బీహార్ ప్రజలు, కాశ్మీరీ పండిట్లకు సంబంధించిన అంశాలపై చేసిన జోకులు సోషల్ మీడియాలో తీవ్ర చర్చకు దారితీశాయి. కామెడీ పేరుతో ప్రాంతీయ అస్తిత్వాలు, చారిత్రక విషాదాలను ప్రస్తావించడం పట్ల పలువురు అభ్యంతరం వ్యక్తం చేస్తున్నారు. షోలో అతిథిగా పాల్గొన్న కమెడియన్ షరాన్ వర్మతో సమయ్ రైనా చేసిన సంభాషణే తాజా వివాదానికి కారణమైంది. షరాన్ వర్మ బీహార్కు చెందినవారని, ఉపాధి కోసం ముంబైకి వచ్చారని ప్రస్తావిస్తూ సమయ్ రైనా కొన్ని వ్యాఖ్యలు చేసినట్లు తెలుస్తోంది. బీహార్ ప్రజలు మాట్లాడే భాషా శైలిపై కూడా జోకులు రావడంతో సోషల్ మీడియాలో విమర్శలు మొదలయ్యాయి. దీనికి ప్రతిస్పందనగా షరాన్ వర్మ చేసిన వ్యాఖ్యలు కాశ్మీరీ పండిట్ల వలస అంశాన్ని ప్రస్తావించేలా ఉన్నాయని పలువురు నెటిజన్లు అభ్యంతరం వ్యక్తం చేస్తున్నారు. 1990లలో కాశ్మీర్ నుంచి కాశ్మీరీ పండిట్లు వలస వెళ్లాల్సి వచ్చిన చారిత్రక నేపథ్యాన్ని కామెడీ కోసం ఉపయోగించడం సరికాదంటూ విమర్శలు వెల్లువెత్తుతున్నాయి. కాశ్మీర్లో రాళ్లు రువ్వే ఘటనలపై జరిగిన వ్యాఖ్యలు కూడా వివాదానికి మరింత ఆజ్యం పోశాయి. ఈ అంశంపై రాజకీయ నాయకులు కూడా స్పందిస్తున్నారు. మహారాష్ట్రకు చెందిన బీజేపీ ఎమ్మెల్యే రామ్ కదమ్, బీహార్ మంత్రి మిథిలేష్ తివారీ ఈ వ్యాఖ్యలను ఖండించినట్లు సమాచారం. ప్రజల భావోద్వేగాలు, చారిత్రక విషాదాలను వినోదం కోసం ఉపయోగించడం తగదని వారు అభిప్రాయపడుతున్నారు. సోషల్ మీడియాలోనూ షోపై విమర్శలు కొనసాగుతున్నాయి. కామెడీకి హద్దులు ఉండాలని, ఒక ప్రాంతం లేదా వర్గానికి చెందిన ప్రజల భావాలను దెబ్బతీసేలా వ్యాఖ్యలు చేయకూడదని పలువురు నెటిజన్లు అభిప్రాయపడుతున్నారు. మరోవైపు కామెడీని కామెడీగానే చూడాలని కొందరు వాదిస్తున్నప్పటికీ, ఈ చర్చ మాత్రం మరింత విస్తరిస్తోంది. కాగా, ఈ కార్యక్రమం గతంలోనూ వివాదాల్లో నిలిచింది. మొదటి సీజన్ సందర్భంగా యూట్యూబర్ రణ్వీర్ అల్లాబాడియా చేసిన వ్యాఖ్యలపై తీవ్ర విమర్శలు, పోలీసు ఫిర్యాదులు రావడంతో అప్పటి ఎపిసోడ్లను తొలగించాల్సిన పరిస్థితి ఏర్పడింది. రెండో సీజన్లోనూ పలువురు ప్రముఖులతో జరిగిన రోస్టింగ్ సంభాషణలు ఇప్పటికే చర్చనీయాంశమయ్యాయి. తాజా బీహార్-కాశ్మీర్ వివాదంపై సమయ్ రైనా లేదా షరాన్ వర్మ నుంచి ఇప్పటివరకు అధికారిక బహిరంగ ప్రకటన వెలువడినట్లు సమాచారం లేదు. అయితే ఈ ఎపిసోడ్కు సంబంధించిన వివాదం సోషల్ మీడియాలో కొనసాగుతుండటంతో, నిర్వాహకులు ఎలా స్పందిస్తారన్నది ఆసక్తికరంగా మారింది
