ఉద్యోగాలు, ఆరోగ్యం, రోడ్లపై ప్రత్యేక కార్యాచరణ AP CM | ఆంధ్రప్రభ, వెబ్ డెస్క్ : అల్లూరి సీతారామరాజు జిల్లాలోని అరకు లోయ మండలం గన్నెలలో ముఖ్యమంత్రి చంద్రబాబు పర్యటించారు. ఏజెన్సీ ప్రాంతాల అభివృద్ధికి ప్రభుత్వం ప్రత్యేక ప్రాధాన్యత ఇస్తోందని తెలిపారు. గిరిజనుల జీవన ప్రమాణాలను మెరుగుపరచడం, వారికి ఉపాధి అవకాశాలు కల్పించడం, మెరుగైన వైద్య సేవలు అందించడం, మారుమూల గ్రామాలకు రవాణా, సమాచార సదుపాయాలు కల్పించడమే ప్రభుత్వ ప్రధాన లక్ష్యమని స్పష్టం చేశారు. గిరిజన ప్రాంతాల్లో ఉన్న ఉద్యోగాలు గిరిజనులకే దక్కేలా అందరికీ ఆమోదయోగ్యమైన ప్రభుత్వ ఉత్తర్వును త్వరలో తీసుకొస్తామని సీఎం హామీ ఇచ్చారు. ఈ అంశంపై ప్రభుత్వం అన్ని వర్గాల అభిప్రాయాలను పరిగణనలోకి తీసుకుని నిర్ణయం తీసుకుంటుందని తెలిపారు. స్థానిక యువతకు ఉపాధి అవకాశాలు పెరగడంతో పాటు ఏజెన్సీ ప్రాంతాల ప్రజలకు ఉద్యోగాల్లో సరైన ప్రాధాన్యం దక్కేలా చర్యలు చేపడతామని పేర్కొన్నారు. ఏజెన్సీ ప్రాంతాల్లో వైద్య సేవల బలోపేతంపై కూడా ప్రభుత్వం ప్రత్యేకంగా దృష్టి సారిస్తోందని చంద్రబాబు తెలిపారు. రాబోయే మూడు నెలల్లో ప్రాథమిక ఆరోగ్య కేంద్రాలను మరింత మెరుగుపరిచి, అవసరమైన వైద్య పరీక్షలు అక్కడే నిర్వహించేలా ఏర్పాట్లు చేస్తామని చెప్పారు. చిన్నచిన్న వైద్య పరీక్షల కోసం గిరిజనులు దూర ప్రాంతాలకు వెళ్లాల్సిన పరిస్థితి లేకుండా చూడడమే లక్ష్యమన్నారు. మారుమూల గిరిజన గ్రామాల్లో అత్యవసర వైద్య సేవలు సకాలంలో అందడం చాలా ముఖ్యమని, అందుకు అవసరమైన మౌలిక సదుపాయాలను కల్పిస్తామని తెలిపారు. ఆరోగ్య సేవలతో పాటు గిరిజన కుటుంబాల పోషకాహారం, తాగునీరు, పారిశుద్ధ్యం వంటి అంశాలపైనా దృష్టి పెడతామని పేర్కొన్నారు. ఏజెన్సీ ప్రాంతాల్లో ఇప్పటికీ అనేక గ్రామాలు సరైన సమాచార, సమాచార ప్రసార సదుపాయాలకు దూరంగా ఉన్నాయని సీఎం గుర్తుచేశారు. ఈ సమస్యను పరిష్కరించేందుకు అవసరమైన ప్రాంతాల్లో సెల్టవర్లు ఏర్పాటు చేసి మొబైల్ కనెక్టివిటీని మెరుగుపరుస్తామని హామీ ఇచ్చారు. దీంతో అత్యవసర సమయాల్లో ప్రజలకు సమాచారం చేరడం సులభమవుతుందని, విద్య, వైద్యం, ఉపాధి రంగాల్లోనూ ప్రయోజనం కలుగుతుందని తెలిపారు. గిరిజన ప్రాంతాల అభివృద్ధిలో రహదారుల పాత్ర కీలకమని చంద్రబాబు అన్నారు. మారుమూల గ్రామాలకు త్వరితగతిన రహదారులు నిర్మించి రవాణా సౌకర్యాలను మెరుగుపరుస్తామని చెప్పారు. సరైన రోడ్లు ఉంటే విద్య, వైద్యం, మార్కెట్ సదుపాయాలు ప్రజలకు మరింత చేరువవుతాయని తెలిపారు. గిరిజన కుటుంబాల ఆదాయం పెంచడంపై ప్రభుత్వం ప్రత్యేక కార్యాచరణ రూపొందిస్తుందని సీఎం పేర్కొన్నారు. స్థానికంగా లభించే వనరులు, వ్యవసాయం, ఉద్యాన పంటలు, అటవీ ఉత్పత్తుల ద్వారా గిరిజన కుటుంబాలకు మెరుగైన ఆదాయం వచ్చేలా చర్యలు తీసుకుంటామని తెలిపారు. అరకు, ఏజెన్సీ ప్రాంతాల అభివృద్ధి కేవలం రోడ్లు, భవనాల నిర్మాణంతోనే పరిమితం కాకూడదని, అక్కడి ప్రజల ఆరోగ్యం, ఉపాధి, ఆదాయం, విద్యా అవకాశాలు మెరుగుపడేలా సమగ్ర ప్రణాళికతో ప్రభుత్వం ముందుకు సాగుతుందని ముఖ్యమంత్రి చంద్రబాబు స్పష్టం చేశారు
