తుపాకీతో తీర్పు..! Andhra prabha Crime News పాత గొడవ.. చెలరేగి కక్షగా మారి.. చివరకు తుపాకీ కాల్పులకు దారితీసినట్లు అనుమానిస్తున్న ఘటన మహారాష్ట్రలోని పుణె జిల్లాలో కలకలం రేపింది. షిరూర్ తాలూకాలో శుక్రవారం ఉదయం ఓ బీర్ బార్ నిర్వాహకుడిని దుండగులు కాల్చి చంపారు. బైక్పై స్నేహితుడితో కలిసి వెళ్తున్న అతడిని వెంబడించి మరీ కాల్పులు జరిపినట్లు పోలీసులు అనుమానిస్తున్నారు. ఈ ఘటనలో హరిశ్ అలియాస్ హరి దాదాభావు గంగావనే (33) ప్రాణాలు కోల్పోయాడు. ఈ హత్యకు సంబంధించి రోహిత్ సోనావణె (23), అనికేత్ గవాణె (23), ఆదిత్య పవార్ (24)లను అనుమానితులుగా పోలీసులు గుర్తించారు. వారి కోసం గాలింపు చేపట్టారు. షిరూర్లోని డాక్టర్ బీఆర్ అంబేడ్కర్ చౌక్ సమీపంలోని ఓ ఇరుకైన వీధిలో శుక్రవారం ఉదయం సుమారు 6.30 గంటలకు ఈ ఘటన చోటుచేసుకుంది. హరి తన స్నేహితుడితో కలిసి మోటార్సైకిల్పై వెళ్తుండగా.. ముగ్గురు అనుమానితులు వారిని వెంబడించినట్లు పోలీసుల ప్రాథమిక విచారణలో వెల్లడైంది. దేశీయంగా తయారైన తుపాకులతో నిందితులు కాల్పులు జరిపినట్లు పోలీసులు అనుమానిస్తున్నారు. ఓ బుల్లెట్ హరికి తగలడంతో అతడు అక్కడికక్కడే కుప్పకూలిపోయాడు. బైక్పై వెనుక కూర్చున్న స్నేహితుడు మాత్రం ఎలాంటి గాయాలూ లేకుండా బయటపడ్డాడు. కాల్పుల శబ్దం విన్న స్థానికులు పోలీసులకు సమాచారం అందించారు. పోలీస్ ఇన్స్పెక్టర్ వినోద్ పాటిల్ నేతృత్వంలోని బృందం ఘటనా స్థలానికి చేరుకుంది. ఫోరెన్సిక్ సిబ్బంది ఆధారాలు సేకరించడంతోపాటు, అక్కడ లభించిన ఖాళీ తూటాలను స్వాధీనం చేసుకున్నారు. తీవ్రంగా గాయపడిన హరిని ఆస్పత్రికి తరలించగా.. అప్పటికే మృతి చెందినట్లు వైద్యులు నిర్ధారించారు. హత్య వెనుక పాత వివాదం ఉన్నట్లు పోలీసులు ప్రాథమికంగా అనుమానిస్తున్నారు. హరి ఓ బీర్ బార్ నిర్వహిస్తుండగా.. కొన్ని నెలల క్రితం అక్కడికి వచ్చిన నిందితులకు, అతడికి మధ్య చెల్లింపుల విషయంలో గొడవ జరిగినట్లు సమాచారం. ఆ క్రమంలో హరి వారిపై దాడి చేసినట్లు కూడా పోలీసుల విచారణలో అనుమానాలు వ్యక్తమయ్యాయి. అప్పటి నుంచి కక్ష పెంచుకున్న నిందితులు ప్రతీకారం తీర్చుకోవాలని భావించి ఉండొచ్చని పోలీసులు అనుమానిస్తున్నారు. ఈ క్రమంలో గురువారం రాత్రి అంబేడ్కర్ చౌక్ సమీపంలో హరిని నిందితులు ఎదుర్కొన్నట్లు తెలుస్తోంది. ఇరువర్గాల మధ్య మరోసారి వాగ్వాదం జరగ్గా.. స్థానికులు జోక్యం చేసుకోవడంతో అక్కడి నుంచి వెళ్లిపోయినట్లు సమాచారం.శుక్రవారం తెల్లవారుజామున హరి తన స్నేహితుడితో కలిసి నిందితుల్లో ఒకరి బంధువును కలిసేందుకు వెళ్లాడు. ఈ విషయం తెలుసుకున్న ఆ బంధువు.. మరోసారి గొడవకు దిగవద్దని సంబంధిత వ్యక్తికి ఫోన్ చేసి చెప్పినట్లు పోలీసుల దర్యాప్తులో వెల్లడైంది. అయినప్పటికీ, ఆ తర్వాత ముగ్గురు అనుమానితులు హరిని వెంబడించి కాల్పులు జరిపినట్లు పోలీసులు ఆరోపిస్తున్నారు. ఈ హత్య కేసులో నిందితులను పట్టుకునేందుకు షిరూర్ పోలీస్ ఇన్స్పెక్టర్ వినోద్ పాటిల్, స్థానిక క్రైమ్ బ్రాంచ్ ఇన్స్పెక్టర్ ప్రమోద్ క్షీరసాగర్ నేతృత్వంలో ప్రత్యేక బృందాలు రంగంలోకి దిగాయి. అనుమానితుల ఆచూకీ కోసం పలు ప్రాంతాల్లో గాలిస్తున్నారు. ఘటనకు ముం
