వర్షాలు సమృద్ధిగా కురవాలని ఆకాంక్ష.. అన్ని వర్గాల ప్రజలు సుభిక్షంగా ఉండాలని ప్రార్థనలు శ్రీ సత్యసాయి బ్యూరో, ఆంధ్రప్రభ : మత సామరస్యానికి ప్రతీకగా శ్రీ సత్యసాయి జిల్లా పుట్టపర్తిలో ముస్లింలు సామూహిక ప్రార్థనలు నిర్వహించారు. వర్షాభావంతో ఎండిపోయిన చిత్రావతి నదిలో కూర్చుని సుమారు గంటన్నర పాటు ప్రత్యేక ప్రార్థనలు చేశారు. వరుణ దేవుడు కరుణించి సమృద్ధిగా వర్షాలు కురవాలని, చిత్రావతి నది తిరిగి జలకళను సంతరించుకోవాలని ఆకాంక్షించారు. తమ వర్గం కోసమే కాకుండా పుట్టపర్తి, పరిసర గ్రామాల్లోని అన్ని వర్గాల ప్రజలకు నీటి కొరత లేకుండా సుఖసంతోషాలతో జీవనం సాగించాలని ప్రార్థించడం ప్రత్యేకంగా నిలిచింది. సాధారణంగా నీటితో కళకళలాడాల్సిన చిత్రావతి నది ప్రస్తుతం పూర్తిగా ఎండిపోయింది. నదిలో చుక్కనీరు కూడా లేకపోవడంతో పుట్టపర్తి పట్టణంతో పాటు సమీప గ్రామాల్లో నీటి సమస్యపై ఆందోళన వ్యక్తమవుతోంది. ఈ నేపథ్యంలో ప్రకృతి కరుణించి విస్తారంగా వర్షాలు కురవాలని కోరుతూ ముస్లిం మత పెద్దలు, సోదరులు నదిలో సామూహికంగా ప్రార్థనలు చేశారు. ఈ సందర్భంగా ముస్లిం మత పెద్దలు మాట్లాడుతూ వర్షాలు సమృద్ధిగా కురవడం ఒక వర్గానికి సంబంధించిన అంశం కాదని, వర్షాలు పడితే ప్రతి ఒక్కరికీ మేలు జరుగుతుందని అన్నారు. పుట్టపర్తి ప్రాంతంలో నివసించే హిందువులు, ముస్లింలు, క్రైస్తవులు తదితర అన్ని వర్గాల ప్రజలకు నీటి సమస్యలు తొలగిపోవాలని ప్రార్థనలు నిర్వహించినట్లు తెలిపారు. పంటలు సమృద్ధిగా పండాలని, పశుపక్ష్యాదులకు నీరు లభించాలని, ప్రజలందరూ సుభిక్షంగా ఉండాలని ఆకాంక్షించినట్లు చెప్పారు. చిత్రావతి నది పుట్టపర్తి ప్రాంత ప్రజల జీవనంతో ముడిపడి ఉందని, ఒకప్పుడు నీటితో పరవళ్లు తొక్కిన నది ప్రస్తుతం ఎండిపోయిన దృశ్యం బాధ కలిగిస్తోందన్నారు. ఈ పరిస్థితులు త్వరగా మారి నదిలో నీరు ప్రవహించాలని, చెరువులు, కుంటలు నిండాలని కోరుకున్నారు. వరుణ దేవుని ఆశీస్సులతో సమృద్ధిగా వర్షాలు కురిసి ఈ ప్రాంతం పచ్చదనంతో కళకళలాడాలని ప్రార్థించినట్లు తెలిపారు. మత విశ్వాసాలు వేర్వేరైనా ప్రకృతి, నీరు, పర్యావరణం వంటి అంశాలు ప్రతి ఒక్కరినీ ఒక్కటిగా కలుపుతాయని ఈ ప్రార్థనలు చాటిచెప్పాయి. వర్షాల కోసం నిర్వహించిన ఈ సామూహిక ప్రార్థనల్లో ప్రజలందరూ బాగుండాలని, ప్రాంతమంతా సుభిక్షంగా ఉండాలని ఆకాంక్షించారు. ఎండిపోయిన చిత్రావతి నదిని వేదికగా చేసుకుని నిర్వహించిన ఈ ప్రార్థనలు పుట్టపర్తిలో మత సామరస్యం, పరస్పర సౌభ్రాతృత్వానికి ప్రతీకగా నిలిచాయి. ప్రకృతి విపత్తులు, నీటి కొరత వంటి సమస్యలను ఎదుర్కోవడంలో మతాలకు అతీతంగా ప్రజలంతా ఒక్కటిగా నిలవాల్సిన అవసరాన్ని ఈ కార్యక్రమం చాటిచెప్పింది. త్వరలోనే విస్తారంగా వర్షాలు కురిసి చిత్రావతి నది తిరిగి జలకళను సంతరించుకోవాలని, పుట్టపర్తి ప్రాంత ప్రజల నీటి కష్టాలు తీరాలని ప్రార్థనల్లో పాల్గొన్న వారు ఆకాంక్షించారు
