తాష్కెంట్, ఆంధ్రప్రభ : భారత ప్రధాని నరేంద్ర మోదీకి మరో అరుదైన అంతర్జాతీయ గౌరవం దక్కింది. ఉజ్బెకిస్తాన్ విదేశీ నాయకులకు అందించే అత్యున్నత రాష్ట్ర పురస్కారం ‘ఒలీ దరాజలి దోస్త్లిక్’ను ఆ దేశ అధ్యక్షుడు షవ్కత్ మిర్జియోయెవ్ ప్రధాని మోదీకి ప్రదానం చేశారు. భారత్-ఉజ్బెకిస్తాన్ మధ్య స్నేహ సంబంధాలను మరింత బలోపేతం చేయడంలో మోదీ చేసిన కృషికి గుర్తింపుగా ఈ గౌరవాన్ని అందించారు. మోదీకి దక్కిన 36వ అంతర్జాతీయ పురస్కారం ఇదే కావడం విశేషం. ఉజ్బెకిస్తాన్ రాజధాని తాష్కెంట్లోని కుక్సరాయ్ అధ్యక్ష భవనంలో జరిగిన కార్యక్రమంలో మోదీ ఈ పురస్కారాన్ని అందుకున్నారు. ఈ గౌరవాన్ని భారతదేశంలోని 140 కోట్ల మంది ప్రజలకు అంకితం చేస్తున్నానని ప్రధాని మోదీ తెలిపారు. ‘ఒలీ దరాజలి దోస్త్లిక్’ పురస్కారం అందుకోవడం ఎంతో గౌరవంగా ఉందని పేర్కొన్న మోదీ, భారత్-ఉజ్బెకిస్తాన్ మధ్య ఉన్న శాశ్వత స్నేహబంధానికి ఇది ప్రతీక అని అన్నారు. రెండు దేశాల నాగరికతల మధ్య ఉన్న అనుబంధం మరింత బలపడాలని ఆకాంక్షించారు. ‘దోస్త్లిక్’ అంటే స్నేహం అని గుర్తు చేసిన ప్రధాని మోదీ, ఈ గౌరవం రెండు దేశాల మధ్య బంధాన్ని మరింత బలోపేతం చేస్తుందని పేర్కొన్నారు. ఇరు దేశాల మధ్య రాజకీయ, ఆర్థిక, వ్యూహాత్మక రంగాలతో పాటు వాణిజ్యం, సాంకేతికత తదితర విభాగాల్లో సహకారం మరింత విస్తరించాలని ఆశాభావం వ్యక్తం చేశారు. మోదీ ఉజ్బెకిస్తాన్ పర్యటన సందర్భంగా ఇరు దేశాల మధ్య కీలక చర్చలు జరుగుతున్నాయి. ముఖ్యంగా వాణిజ్యం, పెట్టుబడులు, సాంకేతికత, వ్యూహాత్మక రంగాల్లో పరస్పర సహకారాన్ని మరింత విస్తరించడంపై దృష్టి సారించారు. ఇరు దేశాల మధ్య యురేనియం సరఫరాకు సంబంధించిన ఒప్పందం కూడా కుదిరినట్లు సమాచారం. ఉజ్బెకిస్తాన్ అధ్యక్షుడు షవ్కత్ మిర్జియోయెవ్ భారత్పై ప్రశంసలు కురిపించారు. ప్రధాని మోదీ నాయకత్వంలో భారత్ వేగంగా అభివృద్ధి చెందుతోందని, ఇరు దేశాల మధ్య సంబంధాలు మరింత బలపడుతున్నాయని పేర్కొన్నారు. ఈ పర్యటన అనంతరం ప్రధాని మోదీ కిర్గిస్తాన్కు వెళ్లనున్నారు. అక్కడ సెప్టెంబర్ 1 వరకు జరగనున్న ఎస్సీవో సదస్సులో పాల్గొననున్నారు. ఈ సందర్భంగా పలు దేశాధినేతలతో మోదీ సమావేశమయ్యే అవకాశం ఉంది
