ఆంక్షల ఉచ్చులో ఇరాన్ ఆర్థిక వ్యవస్థ! అమెరికా ఆంక్షలు, యుద్ధం, ఆర్థిక దిగ్బంధనం ఇరాన్ ఆర్థిక వ్యవస్థను తీవ్ర సంక్షోభంలోకి నెట్టాయి. విదేశీ వాణిజ్యం భారీగా తగ్గిపోవడంతో పాటు ద్రవ్యోల్బణం ఆకాశాన్నంటుతోంది. రియాల్ విలువ పతనం, చమురు ఎగుమతులపై ఆంక్షలు, బ్యాంకింగ్ లావాదేవీలపై పరిమితులు ఇరాన్ ప్రభుత్వానికి కొత్త సవాళ్లు విసురుతున్నాయి. సామాన్య ప్రజలపై జీవన వ్యయం, ఆహారం, ఇంధనం, అద్దెల భారం పెరుగుతోంది. మరోవైపు అమెరికా ఇరాన్తో వాణిజ్యం చేసే దేశాలపై కూడా ద్వితీయ ఆంక్షల హెచ్చరికలు జారీ చేస్తోంది. దీంతో ఇరాన్కు అంతర్జాతీయ వాణిజ్య మార్గాలు మరింత కష్టతరమవుతున్నాయి. జూన్లో ఇరాన్ సుమారు 90 మిలియన్ బ్యారెళ్ల చమురు విక్రయించగలిగినా, భవిష్యత్ ఎగుమతులపై ఆంక్షల ప్రభావం కొనసాగుతోంది. ఇదే సమయంలో ప్రపంచ చమురు, ఎల్ఎన్జీ రవాణాలో కీలకమైన హోర్ముజ్ జలసంధిపై ఉద్రిక్తతలు పెరుగుతున్నాయి. నౌకల రాకపోకలు తగ్గడం ప్రపంచ ఇంధన మార్కెట్లకు కూడా హెచ్చరికగా మారింది. దీనిపై సమగ్ర విశ్లేషణ.. Iran-Economic Crisis-2026 | ఆంధ్రప్రభ వెబ్, అంతర్జాతీయ ప్రతినిధి : అమెరికా ఆంక్షలు.. యుద్ధం.. ఇరాన్ ఆర్థిక దిగ్బంధనం.. వీటన్నింటి మధ్య ఇరాన్ ఆర్థిక వ్యవస్థ తీవ్ర ఒత్తిడిలోకి జారుతోంది. ఒకవైపు అమెరికా ఆంక్షలను మరింత కఠినతరం చేస్తుండగా.. మరోవైపు యుద్ధం దేశ మౌలిక సదుపాయాలు, వాణిజ్యం, ఇంధన రంగాలపై భారాన్ని పెంచుతోంది. ఫలితంగా సామాన్యుల జీవన వ్యయం పెరుగుతోంది. ద్రవ్యోల్బణం అదుపు తప్పుతోంది. జాతీయ కరెన్సీ రియాల్ విలువ పడిపోతోంది. ఇరాన్ అధ్యక్షుడు మసౌద్ పెజెష్కియాన్ వెల్లడించిన వివరాల ప్రకారం.. అమెరికా ఆంక్షలు, దిగ్బంధనం కారణంగా దేశ దిగుమతులు, ఎగుమతులు దాదాపు 35 శాతం తగ్గిపోయాయి. మరోవైపు వార్షిక ద్రవ్యోల్బణం 66 శాతానికి చేరినట్లు నివేదికలు చెబుతున్నాయి. ఇరాన్కు సైనిక ఒత్తిడి కొత్త కాదు. కానీ యుద్ధంతో పాటు ఆర్థిక ఆంక్షలు కొనసాగడం ఇప్పుడు దేశ ఆర్థిక వ్యవస్థకు ద్వంద్వ దెబ్బగా మారింది. అమెరికా ఆంక్షలు ఇరాన్ను అంతర్జాతీయ ఆర్థిక వ్యవస్థ నుంచి మరింత దూరం చేస్తున్నాయి. చమురు విక్రయాలు, బ్యాంకింగ్, డాలర్ లావాదేవీలు, అంతర్జాతీయ వాణిజ్యంపై పరిమితులు పెరిగితే ఇరాన్కు విదేశీ మారకద్రవ్య ఆదాయం తగ్గుతుంది. దిగుమతుల ఖర్చు పెరుగుతుంది. చివరకు ఆ భారమంతా వినియోగదారులపై పడుతుంది. ఇదే సమయంలో యుద్ధం వల్ల ఉత్పత్తి, రవాణా, ఇంధన సరఫరా దెబ్బతింటే వస్తువుల కొరత ఏర్పడి ధరలు మరింత పెరిగే ప్రమాదం ఉంటుంది. ఇరాన్ ఆర్థిక సంక్షోభంలో అత్యంత ఆందోళనకరమైన అంశం ద్రవ్యోల్బణం. గత నెలలో వార్షిక ద్రవ్యోల్బణం 66 శాతానికి చేరిందని కొన్ని నివేదికలు చెబుతున్నాయి. దీని ప్రభావం కేవలం గణాంకాల్లో కనిపించదు. ఆహారం, ఇంధనం, గృహ అవసరాలు, రవాణా వంటి ప్రాథమిక ఖర్చులు పెరిగితే కుటుంబాల కొనుగోలు శక్తి తగ్గిపోతుంది. ఆంక్షల ప్రభావంలో మరో కీలక సమస్య ఇరాన్ కరెన్సీ రియాల్ విలువ పతనం. డాలర్ కొరత, విదేశీ వాణిజ్య పరిమితులు, పెట్టుబడుల తగ్గుదల వంటి అంశాలు కరెన్సీపై ఒత్తిడిని పెంచుతాయి. రియాల్ బలహీనపడితే దిగుమతుల ధరలు పెరుగుతాయి. ఇరాన్ అవసరమైన
